البارحة من مرقدي صحت سمي
يا أعز وأغلا من جميع القرايب
لبيه يا للي لك غلا وسط دمي
لبيه يا ست البشر و الحبايب
يا من تحملتي شقاية وهمي
من صغر سني لين ما صرت شايب
ومهما كبرت احتاج لك دوم ياأمي
تدعين لي ربي يفك النشايب
لجلك بكيتي من بكايه وغمي
ولجلي سهرتي والمدامع سكايب
وأنتي تضميني على الصدر ضمي
ما همتك يمه كبار الصعايب
عطفك وتحنانك منابع تجمي
منه ارتوي وتهون كل المصايب
ومنك نشاء لحمي ودمي وعظمي
فالعين أحطك عن سموم الهبايب
و أرضاك عني هو منايه وهمي
ويجيرني يوم الحشر والكرايب
واليوم بدعي خالق الكون يحمى
جسدك من كل المرض والغرايب
ويشفيك يمه من عنا كل سمي
ويبعدك عن سقم الجروح العطايب